Som – patra Bhara Rah Gaya
Som – patra Bhara Rah Gaya
( Manushhya ka yah jivan kshan – bhangur hai . Abhi hai, abhi nahiin hai ; yah janate huye bhi manushya jab tak jinda rahataa hai, tab – tak maya ke janjeer se jakda rahataa hai. Is shariir ko sukh dene aur sajaane ke liye har sambhav prayas karataa hai, lekin mrityu ke samaksh usakii ek nahiin chalatii . Ek din mrityu aakar aatmaa ko chhiin le jaatii hai aur som – patra rupii shariir yahiin dharaa rah jaataa hai . )
Jiivan kii Dhusar sandhyaa mein
Yagya samaapti kii bela mein
Som – patra rah gayaa bharaa
Bujhane lagii hom – kund kii jwaalaa
Jis tan par thaa itanaa guroor
Man rahataa thaa wasanaa mein choor
Jivan banaa huaa thaa sukh muhrtt
Wahi aaj sabase pahale rooth chalaa
Kabhii bujh jaatii hai shiital pawan ke jhonke se
Aur man tivra unmad liye ud chalaa gagan mein
Kabhii jal uthatii hai virakti kii aabhaa se
Lagataa hai chaandi ke is tan – rath ko
Aatmaa hankate – hankate thak gayaa
Jiine ki uddam laalasaa dharii rah gaii jag mein
Khulate – moondate nayan asahaay snehapaatra ban
Doob rahaa niiravataa ke antah – sthal mein
Yauwan pane ke liye mar – mar kar ham jiite hain
Sada purnataa pane ki ham bhool kiyaa karate hain
Jiwan kaa santosh doosare kaa rodan hotaa hai
Jiwan – garal ko sudha – ras mein
Badalane kaa prayaas sada rahataa hai
Timir hriday ke kone mein kalpanaa ko pirotii rahii
Swasth – lataa sii chaah – lataa failatii chalii gaii
Kis kshan ko ham bhoolen, kis kshan ko yaad Karen
Soch – sochakar aankhon se sarita bahatii chalii gaii
Swarn manjarii –sii diikhatii is jiwan ke
Rajamahal kaa gufaa – dwaar kanhaan hai
Kaun – kaun wahaan dwaarapaal khadaa hai
Kisii ko isakii khabar kahaan hai
Ambar ko choomatii, hawaa mein tairatii
Rang – birangii kalpanaayen rahatii hain
Sugandhit foolon kaa haar liye
Kaamadevii baanhen failaaye khadii rahatii hai
Anuraag samiiron – sa itarataa aur dolataa hai
Abhilaashaa sukh ke swaagat mei sadaa tatpar rahatii hai
Nayan ghaatii mein dukh kabhii ghan – sa chhaata hai
To turant antar kii shiitalataa hawaa ban uda le jaatii hai
Sukh, kapolon par lalii – sa
Aur aankhon mein anjan – sa lagataa hai
Jawanii kii unmaad itanii tiivra hotii hai
Sundarataa kii panw mein payal – sii lipatii rahatii hai
Jiwan kaa yah nishhthur darshan sadaa
Piidaa bharaa aur vedanaadaayak hotaa hai
Jahaan kaliyaan hii kaliyaan diikhatii hain
Wanhii kaanton kaa prant failaa hota hai
|
Added: Monday, 4 July 2005 Modified: |
