KALPANAA
KALPANAA
Aaj kyon merii kalpanaa neeravataa ke
Aanchal men munh chhipaakar sisak-
Sisak kar darakatii diiwaaron se lagkar
Vilakh – vilakh kar hai ro rahee
Kaun see aisee bhayankar aag hai
Jo usake hriday men hai dhadhak rahee
Usake tan-man ko khad-
Foos kii tarah hai jalaa rahee
Akshay jeet aur haar kii paTaraanee
Kyon sookh gaii vishh kaa ek ghoonT peekar
Main vismit khadaa dekhataa rah gayaa
Jab giree wah dharaa par besudh hokar
Jisakee vaishamy neeti par rahatee thee meree kismet khadii
Aaj jeebh kyaa binaa gardan hilaaye chalee gayee
Jo dharakar charaN vijit shikharon par,patang udaayaa karatee thee
Aaj choTon ke Dar se foonk-foonk kar hai kadam rakh rahee
Jisake sneh maatr se maujon par kishtiyaan thee itaraatee
Aaj befikree kee samaa baandhakar toofan kee taraane gaa gaii
Tumhaare haathoM men dukh kaa chiraag thamaa gaii
Aakaash men dundubhee see bajatee, sindhu shail tak ko kanpaa gaii
Jeevan raanee alasaa rahee thee jab meree
Tum puravaa banakar door nidraa men le gaii thee
Jis roop kee jhankee leker kaliyaan rahatee hain band
Tum use bhee kholkar mujhe dikhalaaii thee
Chir aatmaa se asthee panjar tak kee jhalak dikhaane
Jeevan kusum men gandh banaakar, adhron kee chir sudhaa banaakar
Mere hriday-tam kee vedii men,tum prakaash ban aaii thee
Aaj vishw ke padchap se ho kyon tum hil rahee
Bolo chir yauvanaa, tum boodhhee kamjor kaise ho gaii
Binaa peeye rah na sakaa koii
Tumhaare adhron kee madhur pyaalee
Sabake hriday shiraa men daud rahee tum
Khoon sang milakar, ban ravanee
Tumane hee to shikhaa laayaa thaa mujhako
Ro-o mat ronaa hai paap yahaan
Kalpanaa ko jo jalaa sake
Jag men aisaa tap kahaan
To fir tumhaare nayanon men ashrughaTaa kaise umad aayee
Jab kee jwaalaa bhee hansatii hai, tumhaare puny prataap se yahaan
Main poochhataa hoon tumase, tumhee kaho kalpanaa
Kyaa dharatee jeevit rah sakatee hai tumhaare binaa
To fir kyon ashru barasaat ho kar rahee
Aao fir se kar do meree aatmaa ko nav-nirmit
Kyonki tumhaare sivaa kaun hai meraa yahaan parichit
|
Added: Friday, 18 November 2005 Modified: |
