Chamelee Kya Yaad Hai Tumako
Chamelee Kya Yaad Hai Tumako
Ateet kee kathayen manuj ko ati kasht detee hain
Fir bhee hriday ko bajrakar tumako sunaata hoon
Ise sunkar tum man ko dukhee mat karanaa
Kyonkii hriday tumhaaraa ati komal hai
Baaton –baaton men tumhaare drigon se
KaruNaa plavit hokar jharanaa ban nikal aatii hai
Chamelee kyaa yaad hai tumako
Purn chandramaa kii wah ardha- raatree
Jab tum sheetal pawan kaa jhonkaa ban
Mujhase milane dabe paanw chhat par aayee thee
Aur meraa ang-ang kanpaa gayee thee
Bhay aur laaj se tumhaare gaalon kee
Laalee aur surkh ho gayee thee
Mere bhee hriday-tamaal ke kunjon se
Sammohan kee vanshee baj uthee thee
Tum nirmishesh ho apane tan-man
Kee sudhee bhulaa dee thee
Chidhh gayee thee chandanee tumako dekhakar
Sihar uthaa thaa malay pawan
Tumhaare saason ke saurabh ko peekar
Grishm –saan bichhaa thaa tumhaare hriday men
Preeti kshudhaa kee bhookh miTaane ko lekar
Tumhaare hriday taTinee ke taT par hotaa thaa
Jo meraa apanaa sundar manohar ghar
Jahaan rahataa thaa main, ab wah kahaan hai
Wah snigdh saundary ab tumhaaraa kahaan hai
Kajaraare nain, hoThon kee laalee, ghungharaale-
Bal, wah unmaad tum-men ab kahaan hai
Chakaii chakabe-saa hum donon, raat
Alag-alag vyateet kiyaa karate the
Intajaar men jab thak jaate the, tab
Tab tum apane hriday-kunj men le jaakar
Bade pyaar se prem-sej par sulaakar
Preeti –loree gaakar sunaayaa karatee thee
Chamelee kyaa yaad hai tumako
|
Added: Friday, 18 November 2005 Modified: |
