DYuT KRIIDAAGRIH HAI SAJAA HUAA
DYuT KRIIDAAGRIH HAI SAJAA HUAA
Duniyaa ke is dyUt kriidaagrih men
Mama Shakuni ke chatur pash men
Param pUjy pitaamah hain maujUd
Sinhaasan par baiThii Gaandhaarii - sii
Saansen bhii hain , jo swayn baandh rakhii hain
Aankhon par andhepan kii paTTii
Dhriitaraashhtra saa madhur vachan bolanewaalaa
Sasur bhii hai netrahiin, ganbhiir, badhir
Tumhaaraa pyaaraa devar, Duhashaasan bhii hai
Jo aankhon kii putaliyon men chhupaaye huye hai
Tumhaare chiiraharaN kaa bhaavii tasaviir
Satyavaadii YudhishhThir - saa pati bhii hai
Tumako daav par lagaane ko aatur
ShreshhTh dhanurdhar Arjun bhii hai, jo
Laa degaa tumako Subhadraa - sii sautan
Kis baat kii kamii rah gaii hai
Is dyUt kriidaagrih men paanchaalii
Jo tum abhii tak nahiin aaii
Vidur- saa niitishaastra kaa gyaataa
Kakashrii is duniyaa men ab nahin rahe
Unase tumhaaraa parichay karawaaUn kaise
Haan, Duhashaasan -saa devar tumhaaraa
Chiir haraN ko yahiin hai baiThaa
Kuruvansh ke rakhawaale DroNaacharya
Aur pitaamah bhii yahiin hain
Sabhii shant, aatur palaken bichhaaye
Apane aasan par baiThe huye hain
Sirf tumhaaraa chiiraharaN honaa hai baakii
Ab na koii Vyaas, mahaabhaarat rachegaa
Na hii KrishhNa kisii ko bahan banaayegaa
Ab Draupadii kam, Siitaa yahaan jyaadaa aayegii
Kyonki har Sitaa ko van men jaanaa hai
Aur agnikunD men kUdakar paativratya kaa
Saboot dekar bhii, dharatii men samaa jaanaa hai
Par ab Duryodhan ke shaasanakaal men
Draupadii kaa aanaa nitaant aavashyak hai
Jo apane pati ko kah sake
Apanon kii chhaatii kaa lahU laa do
Mujhe shoNit snaan karanaa hai
Par afasos to yah hai ki
Draupadii ko Bhiim - saa pati milanaa mushkil hai
Draupadii jab tak dyUt kriidaagrih men
ChiiraharaN karawaane nahiin aayegii
Tab tak Duryodhan, Duhashaasan aur Shakuni
Aise hii dyUt kriidaagrih ko sajaate rahenge
Draupadii ke hamashakal kaa chiiraharaN hotaan rahegaa
Kyonki KrishNa tumako chhodakar aur
Kisii ko bahan nahiin maanate, varanaa ek baar
Fir se naarii-rakshaa ko yahaan nahiin aate
|
Added: Sunday, 28 August 2005 Modified: |
