EK PAALAKII , CHAAR KAHAAR
EK PAALAKII , CHAAR KAHAAR
Sandhyaa kii is godhooli welaa mein
Mahaasamar kii antim yaatraa mein
Shaamil hone ko koun hai baithii
Mere hriday ke dahaliij mein
Lagataa hai vidhi ho gayaa hai bavalaa
Bhejaa hai mujhako le jaane, apane ghar
Sang laayaa hai ek paalakii, chaar kahaar
Lal chunar aur ek haar
Rah – rah kar hai, mujhako pukaar rahii
Isakii aawaj mein hai, kitanaa dard bharaa
Jo mere asthipanjar ko khiichakar
Maans se hai, baahar nikaal rahaa
Ye kaisii aawaaj hai, bilkul shabdahiin
Hriday – vidaarak, bechainii bharii gamagiin
Jise sunakar hai, meraa kalejaa kaanp rahaa
Kyon yah mere chaTTan dil ko hai hilaa rahii
Isakii aawaaj itanii hriday – vidaarak kyon hai
Kyaa chhupa rahii hai , apanii karatalii mein
Lagataa hai, mere liye ko – ii paigaam hai laa – ii
Jise dene kii himmat, jutaa rahii hai dil mein
Pratiksha kii ghadiyaan jab khatam hone ko aa – ii hain
Madhur Milan ki welaa ho aa – ii hai
Tab kyon mere hriday par chalane lagaa nashtar
Bikhadane lagii aakaankshaaon ki maala TooTakar
Jis hriday se uThatii thii, sangiit kii dhwani baar – baar
Aaj kyon machaa huwaa hai wahaan, haahaakaar
Jis tan se nikalatii thii madhuras kii dhaar
Wahaan kyon ban rahaa hai, aansoo – on se motiyon ka haar
Kisake liye chhor rahii ho tum
Aawaajon kaa kaatar taral tarang
Kisako dubane aa – ii ho tum
Hriday- khoon kaa baahaakar lal rang
Kyon mere hriday mein khoon ruk – ruk kar bahaataa hai
Kyon merii aankhon se ashrudhaar nikalane se ghabaraatii hai
Kyon chameli kii latikaa, komal kaliyon ko
Todakar mere liye sugandhit haar banaatii hai
Kyaa aparaadh kiyaa hai maine
Jo mere sanchit koshh ko luTane
Atithi ban itanii der tak
Mere hriday – dwaar kii chaukaTh par baiThii ho
Kyon Darata hai hriday mera, usake sang jaane se
Kaagaj kii ye kishtii, kaise bachaayegii doobane se
Sach – sach batalanaa dhanyaa, kahaan se tum aa-ii ho
Lal chunar mein lipaTii, kis rishii kii kanyaa ho
Apane aanchal mein angaara bhar kyon laatii ho
Kyon is shiital wishw ko jalaane par tulii ho
Apane brihat – vishaal Daraawane chehare se
Kyon baar – baar ghoonghaT uThaa rahii ho
Jo chhaTapaTa rahe hon khud hii
Use tum ab mat maar
Kyon karatii ho tum, is bhootal par
Apanii kroorataa kaa vyaapaar ?
|
Added: Thursday, 14 July 2005 Modified: |
