TUM PHOOL HO MERE AANGAN KAA
TUM PHOOL HO MERE AANGAN KAA
Kab tha aisaa samay is dharatii par
Jab tumhaaraa astitwa nahiin thaa
Madhur swapnaon kii parchhaahiin banakar
Tum sadaa mere aangan mein the
Dhaval jyotsanaa kii chandanii mein nabh biich
Taarak – dal sang aankh – michaulii khelaa karate the
Bhaavii ushhaaon ke nabh se, kiranon ke setu
Se hokar tum roj milane aayaa karate the
Main bhii aakaankshaaon ke shikharon par chaDhakar
Kalpanaaon ke madhu-jal se , tumako nahalaayaa karatii thii
Aur kshiir-ghaT liye, tumhaarii raah johaa karatii hii
Kaun saa aisaa, sundar phool thaa is dharaa par
Jisamen tumhaare much kii, jhalak nahiin thii
Har phool kii muskuraahaT tumhiin se thii
Yah ambar, jisake jiiwan kaa paawas utar gayaa
Kal tak in mein swarnim chamak, tumhiin se thii
Jab jag so jaata thaa, tab tum
Swarg-kunj ke viral kusum kii Daliyon se
Mere liye sukh ke phool tod late the
Aur mere niind sej par bikharaakar, mujhe
Apane sang swarg –lok tak ghumaa late the
Tumhaarii smriti-maatra se, mere sukh-meghon kaa
Antaratam aalokit ho uThataa thaa
Lagataa thaa ko-ii pavitra dhaara kaa udgam
Chhaaya ban bahataa aa rahaa ho, merii or
Main bhii pulakit hokar donon haathon se
Failaa detii thii, apanaa aanchal usakii Or
Is bhoomii par tumako paakar, meraa swapna moort huwaa
Diwaakar jo tairataa rahataa thaa, akhand nabh mein
Apanii saarii kiraNon ko sameTakar, mere aanchal mein chhup gayaa
Lagaataa hai, mere purva janmon ke achche karmon kaa fal ho tum
Yaa phir is janam kii saghan sadhanaa kaa, jal ho tum
Jiwan se upar uThakar, man ke ahan par
fooTane lage khusiiyon ke naye-naye shrot
Nikalane lagaa madhukarii-giit ur se
Jiiwan- jal se jiiwan ho gaya, ot-prot
Jo such swarg mein bhii alabhya hai
Us sukh ko maine, isii vasudhaa par paa-ii
Surabhii-ghraN aur sushhamaa se, aankhe chakit ho ga-ii
Vibhaasit huwaa sukh, pulakit huwaa sampoorN twachaa
Gandhamaadan ke phoolon kaa, anamol bhuwan –saa
Meera aangan snigdha aur uchchhwaasit ho gayaa
Tumako dekhakar lagataa hai, tum mere hii ur kii aabhaa ho
Jo shishu roop mein roopantar hokar, mere paas aaye ho
Tum mere man ko nav nirmit karanewaali, nav chetanaa ho
Tum mujhase alag nahiin, balki meeraa hii ansh ho
Mere bahurange swapna kii maNikuttim pratimaa ho
Mere praaNon ke saagar mein utarane waale, nav arunoday ho
Tumharii kilakaarii shat-shat madhupon –saa
Mere kaanon mein gungan karatii rahatii hai
Jise sunakar khusiyaan bhii hotii hain, khush
Aur aanandit hota hai, aanand
Tumase meraa ghar-aangan huwaa hai, aalokit
Tumhaare shashi- mukh se , nikalatii hai itanii jyoti
Mere siwa kya, tum bhi sun paa rahe ho
Khush raho, swasth raho, chiranjiivii bano
Ishwar kaa yah shubh mangal- may varadaan
Meraa bhii yahi aashirawaad hai kii, tum
Mukt-hridayii bano, vinayii aur nirbhay bano
|
Added: Thursday, 14 July 2005 Modified: |
